Fatwa Online Durood-e-Minhaj
Home Latest Questions Most Visited Ask Scholar
   
فتویٰ آن لائن - کیا اموال تقسیم کرتے ہوئے اولاد کے درمیان عدل نہ کرنے والا گناہگار ہے؟

کیا اموال تقسیم کرتے ہوئے اولاد کے درمیان عدل نہ کرنے والا گناہگار ہے؟

موضوع: ہبہ (ہدیہ)

سوال پوچھنے والے کا نام: غلام فرید       مقام: ڈیرہ غازی خان

سوال نمبر 4984:
السلام و علیکم و رحمۃ اللہ و برکاتہ! میرا سوال یہ ہے کہ اگر کسی کے والد صاحب فوت ہو جائیں اور وہ مرنے سے پہلے اپنی جائیداد کا بٹوارہ اپنی اولاد میں اس طریقے سے کر جائیں کہ کسی کو کم یا زیادہ دے جائیں تو کیا وہ گناہگار ہوں گے یا نہیں؟

جواب:

اگر کوئی شخص تمام اولاد کے مشورے سے غریب اور مالی طور پر کمزور بیٹے یا بیٹی کو باقیوں سے زیادہ حصہ دیتا ہے تو کوئی حرج نہیں۔

اس کے برعکس اگر والد ناانصافی کرتے ہوئے کسی اولاد کو کم دیتا ہے یا بالکل ہی محروم کر دیتا ہے اور کسی کو زیادہ یا سارا مال ہی دے دیتا ہے تو وہ اللہ تعالیٰ کے حضور جوابدہ ہے۔ رسول اللہ صلی اللہ علیہ وآلہ وسلم نے اولاد کے درمیان عدم مساوات سے سخت منع فرمایا اور والدین کو حکم دیا ہے اپنی زندگی میں اموال تقسیم کرتے ہوئے تمام اولاد میں مساوات برتیں اور سب کو برابر دیں۔ والدین کے وصال کے بعد ان کے نام پر موجود جائیداد یا اموال‘ وراثت کے شرعی اصولوں کے مطابق تقسیم ہوں گے یعنی بیٹی کو ایک اور بیٹے کو دو حصے۔ اگر والد نے ناانصافی کی ہے اور کسی اولاد کو محروم کیا ہے تو اسے قانونی چارہ جوئی کر کے اپنا حصہ لینا چاہیے۔ اس صورت میں والد خدا تعالیٰ کے سامنے جوابدہ ہے۔ مزید وضاحت کے لیے ملاحظہ کیجیے:

والدین باقی اولاد کو محروم کر کے جائیداد ایک بیٹے کے نام کر دیں‌ تو کیا حکم ہے؟

واللہ و رسولہ اعلم بالصواب۔

مفتی: محمد شبیر قادری

تاریخ اشاعت: 2018-08-31


Your Comments