پھولوں کی پتیاں استقبال کے لیے نچھاور کرنا کیسا عمل ہے؟

سوال نمبر:1255
السلام علیکم کیا پھولوں کی پتیاں استقبال کے لیے نچھاور کرنا جائز ہے یا گناہ ملتا ہے؟ کیونکہ پتیاں تو تسبیح کرتی ہیں اسی لیے ان کو قبور اور مزارات پر ڈالتے ہیں اور یہی پتیاں پاؤں کے نیچے آئیں تو کیا گناہ ملتا ہے؟

  • سائل: ثاقب ریاضمقام: گجرات
  • تاریخ اشاعت: 03 دسمبر 2011ء

زمرہ: متفرق مسائل

جواب:

پھولوں کی پتیاں استقبال کے لیے نچھاور کرنا جائز ہے۔ گناہ نہیں ملتا، پھولوں کی پتیوں کے علاوہ ہر چیز اللہ تعالیٰ کی تسبیح کرتی ہے، درختوں سے پتے وغیرہ بھی تو کاٹے جاتے ہیں، قرآن مجید میں مختلف مقامات پر آیا ہے کہ

سَبَّحَ لِلَّهِ مَا فِي السَّمَاوَاتِ وَالْأَرْضِ

(الْحَدِيْد ، 57 : 1)

اللہ ہی کی تسبیح کرتے ہیں جو بھی آسمانوں اور زمین میں ہیں،

ہر چیز جو زمین و آسمان میں ہے، اللہ کا ذکر کرتی ہے، لہذا اس میں گناہ والی کوئی باتی نہیں ہے، اگر انسان اس طرح سوچنا شروع کر دے تو پھر نظام حیات متاثر ہوگا۔ جانور جن کو ہم ذبح کرتے ہیں، وہ بھی اللہ کا ذکر کرتے ہیں۔ ہر چیز انسان کے لیے پیدا کی گئی ہے، لہذا اس میں کوئی گناہ نہیں، یہی پھول اور پتیاں مزارات اور عام قبروں پر بھی پھینکی جاتی ہیں اور عام راستے میں بھی ہم کو ملتی ہیں، لہذا اس میں کوئی گناہ والی بات نہیں ہے۔ البتہ ادب اور احترام کی غرض سے ایسے پھولوں اور پتیاں جو مزارات وغیرہ پر پھینکی جائیں انہیں راستے سے ہٹا کر ایک طرف رکھ دینا چاہیے۔

واللہ و رسولہ اعلم بالصواب۔

مفتی: حافظ محمد اشتیاق الازہری

اہم سوالات
  • بٹ کوئن کی ٹریڈنگ کا کیا حکم ہے؟
  • قطع تعلقی کرنے والے رشتے داروں سے صلہ رحمی کا کیا حکم ہے؟
  • مزارات پر پھول چڑھانے اور چراغاں کرنے کا کیا حکم ہے؟