باجماعت نماز کے دوران مقتدی کے کرسی پر بیٹھنے کے کیا احکام ہیں؟
سوال نمبر:6193
السلام علیکم ورحمۃ اللہ و برکاتہ معزز مفتی صاحب!
ایک مسئلہ میں رہنمائی فرماتےہوئے عند اللہ ماجور ہوں ۔ عرض یہ ہے کہ زید گھٹنوں کے عارضہ میں مبتلا ہے ، نماز میں قیام اور رکوع کرنے پر تو قادر ہے البتہ سجدہ کرنے اور تشہد میں دو زانو یا چار زانو بیٹھنے پر قادر نہیں ہے ۔
1. کیا وہ فرض نماز جماعت کے ساتھ پڑھتے ہوئے کرسی پر بیٹھ سکتا ہے؟
2. قیام میں کھڑا ہو سکتا ہے جب کہ صف کی ترتیب میں آگے نکل جاتا ہے ؟
3. اسی حالت میں رکوع کر سکتا ہے ؟
4. اگر بیٹھ کر رکوع و سجدہ کرنے کی اجازت ہے تو ہاتھ کس طرح رکھے گا ؟
سوال پوچھنے والے کا نام: ڈاکٹر محمد عثمان لیاقت جلالی
- مقام: پیپلز کالونی، گوجرانوالہ
- تاریخ اشاعت: 29 مئی 2024ء
موضوع:نماز | عبادات
جواب:
آپ کے سوالات کے جوابات بالترتیب درج ذیل ہیں:
1. جس شخص کو کوئی شرعی عذر لاحق ہو وہ با جماعت نماز بھی کرسی پر بیٹھ کر پڑھ سکتا ہے۔
2. اگر کوئی شخص قیام پر قادر ہو تو اسے قیام کرنا چاہیے باقی نماز کرسی پر بیٹھ کر مکمل کر لے تو شرعاْ کوئی قباحت نہیں ہے۔ صف کی ترتیب بھی شرعی عذر کی وجہ سے برقرار نہیں رہ پاتی۔ جس طرح شرعی عذر کی وجہ سے معذور پر فرائض یعنی قیام، رکوع اور سجدہ ساقط ہو جاتے ہیں، عین اسی طرح ترتیب بھی ساقط ہو جاتی ہے۔ کیونکہ معذور کی ترتیب درست رکھنے کی کوشش کی جائے تو پچھلی صفیں خراب ہوتیں ہیں۔ اس لیے معذور اپنی ترتیب قائم نہ بھی رکھ پائے اس پر معاف ہے۔ مقصد ہے کہ جو شخص جس فرض کی ادائیگی کر سکتا ہے وہ اسے بلا عذر نہ چھوڑے۔ خواہ صف کی ترتیب خراب بھی ہو جائے کوئی حرج نہیں ہے۔
3. اگر رکوع کرنا ممکن ہو تو رکوع بھی کر لے کوئی ممانعت نہیں ہے۔
4. معذور جب بیٹھ کر رکوع اور سجدہ کرے گا تو وہ اشاروں سے رکوع و سجدہ کرے گا۔ رکوع میں کم جھکے اور سجدہ میں تھوڑا سا زیادہ جھک کر سجدہ کر لے۔
کرسی پر بیٹھ کر نماز پڑھنے کی تفصیل جاننے کے لیے سوال نمبر 1310 ملاحظہ کریںواللہ و رسولہ اعلم بالصواب۔